WAHYU KAMULYAN
KIPRAH PRABU YUDA YAKSA….
ADEGAN DURNA & PRABU YUDA YAKSA
ADA ADA
Buta Pandawa tata gati wisaya ,
indriyaksa sara maruta ,
pawana bana margana ,
samirana lan warayang ,
panca bayu wisikan gulingan lima.
YUDA Y : RAMA PENEMBAN DURNA, SAK DERENGIPUN KULO NGATURAKEN SUNGKEM PANGABEKTI..
DURNA : O..LOLE..LOLE..SOMA RANTE EMPRIT GANTIL BUNTUTE OMAH JOGLO…HOWELOH…HOWELOH, IKI ONO PAWONGAN NGATURRAKE PANGABEKTI RO AKU..KOWE KUWI SOPO..
YUDA Y : MENAPA RAMA PENEMBAN SAMPUN KESUPEN KALIYAN KULO, KULO RUMIYEN NATE SUWITA DATENG RAMA PENEMBAN DATEN SUKALIMA….NAMI KULO PUN YUDA YAKSA..PENEMBAN
DURNA : O ALAH…HOK..A…AKU CAPET CAPET RODO ELING….YUDA YAKSA…IYA IYA IYA…LHA KOWE SAK IKI ONO PAPAN KENE ONO OPO…
YUDA Y : INGGIH..NYUWUN SEWU BAPA PENEMBAN…DUGI KULO WONTEN PAPAN MRIKI NGGIH AWIT SAKING KEPINGIN SOWAN WONTEN NGARSANE BOPO PENEMBAN DURNA..WONTEN BAB INGKANG BADE KULO ATURAKEN..
DURNA : LHA ONO PERKORO OPO..
YUDA Y : BOPO PEMBAN RIYEN LAK DADOS GURUNIPUN JANOKO
DURNA : IYA ..BENER..JANOKO KUWI BIYEN MURITKU
YUDA Y : KENGING MENOPO, JANOKO SAGET DADOS SATRIYO KANG KONDANG KAONANG- ONANG, DADOS KINASIHING DEWO, LAN GADAH GELAR SAKING KAYANGAN DADI LELANANGANING JAGAT LANCURING MADYAPADA..LHA KOK KULO MBOTEN SAGET…
DURNA : KOWE PINGIN KONDANG KAYA JANOKO
YUDA Y : NGGIH..
DURNA : YA…ISO..YEN PERLU NGUNGKULI KASEKTENE LAN KEKONDANGANE JANOKO..TAK GOLEKKE GELAR SAKA KAYANGAN
YUDA Y : NOPO SAGET..
DURNA : ISO..KUWI GAMPANG BANGET…
YUDA Y : MENAWI MEKATEN KULO KEPINGIN SUWITO DUMATENG BAPA PENEMBAN..
DURNA : IYA…NANGING OJO SAK IKI…KIRO KIRO SUK BALI MANEH RENE ..UDAKARA 2 OPO 3 SASI IKI YA…
YUDA Y : LHO KOK SAGET MEKATEN
DURNA : IYO IKI AKU ISIH SIBUK…NGURUSI PEGEBLUK MAYANGKARA…SOKO WANGSIT AKU KUDU MATENI KETEK PUTUH ANOMAN…KANGGO MULYANING WONG SAK NEGARA…
YUDA Y : LHO NGATEN MENAWI MEKATEN..KULO BAKAL SABIYANTU…BADE KULO PATENI KETEK PUTIH ANOMAN..
DURNA : LHO IKI AKU ORA NGONGKON LHO..
YUDA Y : MBOTEN MENIKO MRENTUL SAKING ATI KULO PIYAMBAK…KANGGE NGATURAKEN DARMA BEKTI KULO DUMATENG BAPA GURU KULO…
DURNA : YO SUKUR YEN PANCEN MENGKONO..AKU ORA NGONGKON LHO YA..MERGO PANCEN IKI ORA ONO APA-APANE..NGONO
YUDA Y : MBOTEN SAMPUN KULO NIATI..
DURNA : YO YEN NGONO KOWE BAKAL TAK DADEKAKE MURID KINASIH..MENGO BAKAL TAK WENEI ILMUKU KABEH..NEK PERLU BAKAL TAK WENEI GELAR KAYANGAN..WIS MENGKO AKU DEWE SING MUNGGAH KAYANGAN …MENGKO BETARA GURU BAKAL SUNGKAN KARO AKU NEK AKU DEWE SING METUKI…MENGKO TAK GAWAKKE GELAR KAYANGAN SING ISIH ANYAR..GREES SOKO KAYANGAN SING ISIH BUNTELAN PLASTIK…MENGKO GELARE TAK JENENGKE RAJA SINGA….LHO PIYE..COCOK PORA..
YUDA Y : INGGIH COCOK BAPA….MENAWI MEKATEN KULO PADOSANE KETEK PUTIH ANOMAN..BADE KULO KETOKE GULUNE….
DURNA : O YEN NGONO ATI ATI …MUGO MUGO TANSAH CING CING GOLING LAKUMU…
Budalan Sabrang & Buta
JEJERAN NGAMARTA
PANDAWA, KEDAYOAN BEGAWAN DURNA DAN PATIH SENGKUNI, REMBUG NGAMARTA KETAMAN PEGEBLUG
DJANTURAN NGAMARTA
Swuh rep data pitana.
Swuh werdine dadi / rep hanenggih swasana tentrem data hanggayuh / pitana luhur / Dadya tentrem lamun hangesti luhuring kagunan / punika sesanti purwaning carita kinarya hamiwiti pagelaran wayang purwa / Wayang pasemon sembahyang / purwa tegese wiwitan sasmita purwaning lelakon hing jagad gumelar, kathah titahing jawata ingkang kasangga pertala kamulaning akasa / sarta kathah nagari ingkang sami anggana raras / mboya akadi negari Ngamarta / ya ing negari Indraprastha ya ing Mbatana Kawarsa ingkang kinarya bebukaning cinoroning kawi / nalika semanten pitados kaliyan ujaring pujangga / negari Ngamarta kinarya bebukaning carita wenang den pocapake negara panjang... punjung pasir wukir loh jinawi / gemah ripah karta tata tur raharja / panjang werdining dawa punjung aranira dhuwur sineksen kawula dalem tiyang alit sumawana narendra manca nagari narendra ing Ngamarta tuhu narendra ingkang dawa kuncarane / dhuwur kasinggihanira sarta jembar pulatane / ketitik surya pantaraning ratri palupa ing sesami dhemen anggeganjar marang kawulane paring boga kadang saha kawula ingkang nandhang kaluwen / paring obor kadang saha kawula ingkang nandhang pepeteng jagate // pasir... pawukir pasir : samodra wedhi; wukir : harga // sinawang saking mandrawa lenggahing negari Ngamarta ngajengaken wukir dhedhangka mengkeraken samodralaya / nengen – keringaken pasabinan kinapit benawi saha mangku banjaran agung / lir samodra kang tanpa tepi jembar rupaking nagari pranyata kacandra // loh jinawi loh werdining siti tumumpang warih jinawi tulus kang sarwa tinandur / subur kang sarwa tinancepake kinarya pratandha / wiji datan tumanem kabekta kukila miber kecer dhawah mungguhing sela / satemah thukul ijo royo – royo gegodhongane / angrembaka woh - wohane / goring cinarita ujaring dalem tiyang alit nandur pisang bisa awoh kencana salagune kukuse wae mujudake cindhe / gemah sarta ripah gemah lakuning dagang layar nahkodha bakulan lan sapanuggalanira / surya pantaraning ratri dalidir tan ana pedhote lan tebih saking sangsayaning dedalan / ripah mratelaake kathah kawula dalem tiyang alit ingkang sami suwita yen dinulu papan jembar katingal rupak jejel riyel apipit adu tritis nadyanta kathah pasuwitaning kawula dalem tiyang alit // negari Ngamarta wenang den pocapake karta tata tur raharja kabekta duk nalika samana negari adoh saka lakuning parangmuka / adoh saka lakuning kadurjanan / ora ana kawula ingkang darbe pakarti cecengilan panasthenan melik darbeking liyan / nadyan kathahing kawula dalem tiyang alit ingkang sami nggadhahi ingah – ingahan pitik, iwen, kambangan, maesa lan sapiturute / rina pantaraning ratri datan den kandhangake sarta kacancang pranyata boya ajrih lamun kaicalan // nagari Ngamarta adoh saka lakuning parangmuka karana sakathahing abdi dalem kawula alit ingkang abdi dalem bupati surya pantaraning ratri / ngatingalaken manunggaling karsa angangkat karyaning praja semanten kabeh ta wau lumahing bumi kureping akasa kathah negari ingkang sajuga negari Indraprastha / ya negari Ngamarta yasaning satunggiling jawata ingkang dibya sura sekti pramila ngantos jaman samangke katingal ageng daya perbawaning kraton // wenang den pocapake gawat kliwat wingit sato mara sato mati jalma mara keplayu / kinarya pratandha goring carita kukila miber ngungkuli kraton dhawah kantaka luntah ludira dadi lan sirnane / barat kang nempuh kraton mangemper – emper mendhung ngungkuli myang padha sakala / kampuhaning kraton ingkang semanten wancine antuk keparenging jawata sampun dumugi titi wanci sura sudira janingrat lebur dening pangastuti saha wiwalating narendra // lah sapa ta wau dasanamanira narendra ingkang handhepani nagari / dasa : sepuluh; nama wus mesthani ajejuluk sang nata Prabu Sri Darmakusuma, ya sang Puntadewa, ya sang Gunatalikrama, ya sang Ajathasatru, ya nata sang Sadha Dwija Kanka / narendra adhedhasar soma pida dana dhendha lire datan ambau katine / ri sajuga lenggah madyaning dhampar kayap sanggyaning para biyata ingkang samya hanggung ketanggung jaka palara – lara ingkang samya ngampil upacaraning keprabon / banyak dhalang sawunggaling kacuwasta dwipangga kang sarwa rukma / ginebutan laring manyura kanan kering kongas gandaning sang nata pindha klayangan mblabar dumugi ing pangurakan / tembene kang uninga srana sipat kamanungsane / kang yayah Sang Hyang Bathara Dharma hangejawantah binayang – bayang sanggyaning hapsara – hapsari // pepahandher sagung kang samya sumewa yayah robing samodra ing dhedharatan hanggenggeng pasebaning para nayaka para punggawa miwah para kawula lir samodra angeruking dhehdharatan miwah sanggyaning para kadang ingkang sampun kepareng lenggah ing madyaning dhatulaya / kepareng ngaggelah yayah prayitna ing kewuh punika ta warnane / kadang nata satriya ing Unggul Pawenang inggih ing Jodhipati Raden Harya Werkudara, ya Bratasena, ya Wijasena, ya sang Kusumayuda, ya sang Kusumadilaga / tajem ulatane gagah pideksa godheg wok simbar jaja tur ta kasinungan kasekten linangkung bebasan tinatah mendat, jinoroh menter, tinumbak bengkung, sinuduk putung / mila datan mokal lamun tansah cinaket dening sang nata ing Ngamarta sang Prabu Darmakusuma / datan kantun pilenggahipun wuragiling pandhawa satriya ing Sawojajar tuwin Bumiretawu ya Raden Nakula Sadewa, ya Pinten Tangsen kembar busana kembar wicara receh angudang asih pangandikane // ndadak sakala ing mangke kagyat jroning driya sang nata Prabu Dharmakusuma dupi mulat rawuhipun Begawan Durna saha Patih Harya Sengkuni tambuh – tambuh sutaning galih paran wigatosipun dene sampun kepareng rawuh wonten ing nagari Ngamarta // hanginggih handher... mblabar sanggyaning para nayaka ingkang samya nggantung pasisiran parandene jinem jenjem madyaning pasewakan agung nadyan gegodhongan tan ana kang obah samirana datan lumampah / kaperbawan wingit wimbane sang nata ing Ngamarta Prabu Puntadewa // ndadak sakala ing mangke ana tengara tandha sang nata arsa medhar pangandikan / meriem pusaka ngamarta mangambal – ambal ing antariksa // sang nata arsa amurwani pangandikan / kaya mangkana wijiling pangandika sang nata Prabu Dharmakusuma ingkang dereng kababaring lesan.
PATHETAN NEM AGENG
Myat jroning wardaya ngrumpaka kakandha ,
nujwèng ari sajuga ,
Srinata suméwa lênggah dampar dênta ,
ing sitinggil binatara ,
ingadhêp punggawa ingajap pra kênya ,
rungkêp ing paséwakan ,
tintrim kang suméwa ,
samya anilingakên pangandikaning nata.
ADA ADA GIRISA
Umyang swaraning wadya ,
wus samapta munya ,
kêndhang gong bèri arêbut papan
ing sajuru-juru ,
tan ana liru prênah ,
rêkyana patih mangka cucuking ,
pra wadya kuswa ,
risang Wrêsniwira mahambêg sudira ,
prawira tumangguh.
REMBUG
PUNTA : HYANG SUKMANA ADI LINUWIH PAYUNGONO MARANG PANJENENGANINGSUN, KANG SEPISAN NGATURAKE PUJO PUJI SHUKUR MARANG GUSTI KANG AKARYO JAGAT INGKANG SAMPUN PARING KANUGRAHAN MARANG TITAH MANUNGSA SAK JAGAT RAYA, YAYI WERKUDARA….
WERK : MBAREPKAKANGKU ANA DAWUH APA…
PUNTA : YAYI JANAKA…
JANOK : WONTEN DAWUH ..KAKA PRABU
PUNTA : YAYI KEMBAR
KEMB : WONTEN DAWUH KAKA PRABU
PUNTA : SAK WETARA KEPENAKNO NGGONMU LONGGUH YA DI..PUN KAKANG ORA BISA WAWAN PANGANDIKAN MARANG KOWE KABEH..JALARAN RA KALUNGGUHAN SAKIKI NGAMARTA KARAWUHAN TAMU AGUNG PARA PEPUNDEN ..PARA PINI SEPUH ING NEGARA NGASTINA INGKANG SAMPUN RAWUH ING NEGARA NGAMARTA, DUH RAMA PENEMBAN DURNA, SAMI SUGENG SAK RAWUHIPUN WONTEN NEGARI NGAMARTA MENIKA BAPA…
DURNA : O…LHA DALAH..LOLE LOLE SOMA RANTE BUNTUTE OMAH JOGLO…HOWELOH..HOWELOH..MONYOR MONYOR…. NUWUN INGGIH NGGER ANAK PRABU PUNTA DEWA..NISKALA PRAPTANIPUN PUN BAPA SOKALIMA..BIDAL SAKING NEGARI NGASTINO NGANTI DUMUGI ING NGAMARTA MENIKA TANSAH INANJAR KAWILUJENGAN, BAGAS WARANG MBOTEN ALANGAN SETUNGAL MENAPAKEMAWON NGGER..
PUNTA : INGGIH, KEPARENG KULO NGATURAKEN PANGABEKTI MUGI KUNJUK SAHANDAP PEPADA PADUKA KANJENG RAMA PENEMBAN
DURNA : O..INGGIH SAMPUN KULA TAMPI, ANDADOSAKEN BINGAH MANAH KULO,, MBOTEN LANGKUNG TAKLIM IPUN KENG BAPA MGI KUNJUKA WONTEN NGARSANING ANAK PRABU PUNTA DEWA
PUNTA : INGGIH, SAMPN KULO TAMPI KULO PETEGAKEN WONTEN ING PERNOJO MIWAH WARDOYO NDADOSAKEN DAGING RAH KAYUWANAN, KULO ATURI PINARAK LENGGAH INGKANG SEKECA
DURNA : INGGIH MBOTEN KIRANG PAMRAYOGI ANGEN KULO PIRARAK LENGGAH..
PUNTA : PAMAN HARYA SENGKUNI, SAMI WILUJENG PAMAN…
SENG : INGGIH NGGER MBOTEN WONTEN ALANGAN SETUNGGAL MENOPO KEMAWON..KEPARENG KULONGATURAKEN PANGABEKTI WONTEN NGARSANING ANAK PRABU PUNTADEWA
PUNTA : INGGIH PAMAN SAMPUN KULA TAMPI DUMAWAHO SESAMI SAMI
WERKU : DURNO BAPAKKU, SAK TEKAMU NING NGAMARTO BASAKU KATURO KANGGO KANGGO DURNA BAPAKKU..
DURNA : IYA, ANAAKU WERKUDARA, BANGET PANARIMANE PUN BAPA, ORA LIWAT PANGESTUNE PUN BAPA DITOMPOYO NGGER, WERKUDARA..
WERKU : TAK TAMPA DADI AJI JAYA KAWIJAYAN, KEPENAKNO NGONGGU LUNGGUH, BOPO
DURNA : IYA NGGER, ORA DADI BOYO PANGOPO, ORA KURANG PRAYOGO ANGGONE LELENGGAHAN, DI SUNI
SENGK : PIYE, WAKNE GONDEL
DURNA : KAE WERKUDARA, KAE BIYEN MURIDKU, SAKIKI DADI SUKSES, SUGIH, DADI KONDANG KAONANG-ONANG, KUWI YO MERGO DADI MURIDKU..
SENGK : OPO IYA
DURNA : IYA, KAE LHO TAKONO BOCAHE, NEK ORA PERCOYO, RAK YO NGONO TO NGGER WERKUDORO
WERKU : DURNO BAPAKKE ,IYO PANCEN MENGGKONO
DURNA : LHA KAE RUNGOKNO KUPINGMU, SENGKUNI, RACAKKE MURITE BEGAWAN DURNO KI MESTI DADI, DADI UWONG KABEH, SUKSES LAN MESTI KEPENAK URIPE..
JANOK : PANGABEKTI KULO KUNJUK, BOPO PENEMBAN DURNO
DURNA : JANOKO IKI
JANOK : IYAINGGIH BAPA
DURNA : IKI YO MURIDKU DI SUNI, BANGET PANARIMAKU NGGER JANOKO, ORA LIWAT PANGESTUKU TAMPANONO YO NGGER, JANOKO
JANOK : INGGIH, KULO PUNDI ING MUSTOKO NDADOSAKEN JIMAT PARIPIH
DURNA : LHA DALAH, PIYE AWAKE WARAS
JANOK : INGGIH PENGESTUNIPUN WARAS
DURNA : BOJOMU PIYE, BOJOMU
JANOK : INGGIH TANSAH WILUJENG
DURNA : ANAKMU, ANAKMU PIYE
JANOK : TANSAH RAHAYU
DURNA : LHA DALAH, YO SUKUR, SUKUR, IKI JANOKO KI YO MURIDKU LHO DI SUNI
SENGK : OPO IYA
DURNA : ORA PERCOYO TAKONO GALO,, UWONGE ONO, AKUKI OPO TAU NGAPUSI..
PUNTA : BAPA PENEMBAN
DURNA : WONTEN DAWUH NGGER
PUNTA : ANDADOSAKEN KAGYAT MANAH KULO DENE DINTEN SAMANGKE PADUKA RAWUH WONTEN NEGARI NGAMARTO, KEPARENG PARING DAWUH, WONTEN WIGATOS MENOPO, BOPO PENEMBAN
DURNA : NUN INGGIH NGESTOKAKEN DAWUH NGGER
PATHETAN
Hanjrah ingkang puspita rum ,
kasiliring samirana mrik ,
sêkar gadhung kongas gandanya ,
mawèh raras rênaning driya.
DURNA : ANAK PRABU PUNTADEWA
PUNTA : WONTEN DAWUH BAPA
DURNA : NGETEN NGGER, PRAPTANIPUN BAPA ING SOKALIMA, WONTEN NEGARI NGAMARTO MENIKO IANGKANG SEPISAN TILIK KAYUWANANIPUN ANAK PRABU ING NGAMARTO, SUMRAMBAH PORO KADANG PANDOWO, MUDUNE WONTEN KLUWARGO KULOWONGSO, SENTONO, WADYOBOLO, KANG SARTO SADOYO KEMAWON PORO WARGO ING NGAMARTO MENIKO, PUJI SUKUR DUMATENG GUSTI INGKANG AKARYO JAGAT BILIH ING WEKDAL PUNIKO PORO KAWULO TANSAH PINARINGAN WILUJENG MBOTEN WONTEN ALANGAN SETUNGGAL MENOPO KEMAWON, INGKANG NOMER KALEH PUN BAPA MENIKO TANSAH ALAM ONENG, ALAM ONENG MENIKO TEMBUNG LAWAS, ALAM MENIKO TEGESIPUN KANGEN, SAMPUN SAWETAWIS CANDRA LAMINIPUN MBOTEN SAGET PINANGGIH KALEH JENGANDIKO ANAK PRABU ING NGAMARTO DALAH PORO PANDOWO, DENE INGKANG NOMER TIGA, PUN BAPA BADE NYATAKAKEN PAWARTO, UJARE MBOK BAKUL SINAMBIWORO, BILIH ING NEGARI NGAMARTO ING DINTEN MENIKO NEMBE NANDANG PEGEBLUK MAYANGKORO, KABAR MENIKO LERES MENOPO MBOTEN NGGER, KEPARENG KULO NYUWUN DAWUH NGGER..
PUNTA : BAPA PENEMBAN, KALUHURAN DAWUHIPUN BAPA PENEMBAN BILIH ING WEKDAL PUNIKO NEGARI NGAMARTO NEMBE NAMPI PACOBAN SAKING GUSTI INGKANG AKARYO JAGAT, WUJUDIPUN PAGEBLUNG MAYANGKARA, AWISING BOGA KALAWAN WASTRA, LAN KATAH WABAH PENYAKIT ING NEGARI NGAMARTO, BILIH KAWULO ING NGAMARTO NANDANG SAKIT, ISUK GERAH SONTEN DUMUGI PEJAH, SONTEN LORO ISUK DUMUGI PRALOYO, SEDOYO PAMBUDI DAYA SAMPUN DIPUN TINDAKAKEN ANANGING DERENG SAGET DADYO SARONO NEGARI NGAMARTO MENIKO NEMAHI WALUYO JATI, JATI NEMAH NIRMOLO.
DURNA : ANAK , NGETEN NGGER , NADYANTO PUN BOPO MANGGENG WONTEN ING NEGARI NGASTINO ANANGING ING BATOS KULO UGI MENGGALIH ING NEGARI NGAMARTO, AWIT MENOPO, PORO PANDOWO LAN KUROWO MENIKU KABEH MURIT KULO, PRAMILO KANTHI DASAR MENIKO MENAWI ANAK PRABU SUSAH PUN BOPO UGI NDEREK SUSAH, PRAMILO RUMAOS GINUGAH SUPADOS KEPINGIN SABIYANTU, MBUDIDOYO NEGARI NGAMARTO SUPADOS SAGET WALUYO JATI, JATI NEMAH NIRMOLO.
WERK : DURNO BAPAKKU
DURNA : OPO WERKUDORO
WERK : YEN MITURUT DURNA BAPAKKU, OPO SING NJALARI NEGARA NGAMARTA KETAMAN PAGEBLUG SING KOYO NGENE
DURNA : WERKUDORO
WERK : OPO
DURNA : MAU BENGI PUN BOPO, MUNGGAH ONO ING SANGGAR PAMUJAN, GANDENG BOPOKARO PORO DEWO KI DISUNGKANI,PORO DEWO KI YEN KARO BOPO PODO PEKEWUH, MULO PUN BOPO LAGI MEREM WAE WIS LANGSUNG ANTUK PITUDUH, ENTUK WANGSIT, OPO TO SING NGGARAI NEGARA NGAMARTO KETAMAN PAGEBLUK MAYANGKORO KOYO NGENE,
PUNTA : SEBABIPUN MENOPO BAPA PENEMBAN
DURNA : NGETEN NGGER, WANGSITIPUN DEWA, KULO TAMPI KANTI CETA, NGEGLO, TANPO WARONO..NEGARI NGAMARTO KETAMAN PEGEBLUG MENIKO ANCEN WONTEN INGKANG NJALARI, WONTEN SEBABIPU, LHA MENIKO DADOS SUKERTANING JAGAT, SUKERTANING BUMI, INGKANG KEDAH DIPUN SIRNAKAKEN, INGKAN DIPUN PEJAHI MBOTEN SANES NGGIH PUNIKO PENDITO KENDALISODO BEGAWAN ANOMAN, UTAWI KAPIWORO, MENGKE YEN ANOMNA SAMPUN PEJAH..NEGARI NGAMARTO BADE WALUYO JATI, JATI TEMAH NIRMALA.
ADA ADA
Kadangmu pada warahono den becik
Mbesuk aryo mendemo baris
Baris kang prayitno
Ywo saronto wong darawati
Tinumpesan pengawak pandawa
Nara wurung dadi mungsuh
Mungsuh awan kadang
POCAPAN
DERENG DANGU PANGANDIKANE SANG NOTO, PRAPTANE PATIH TAMBAK GANGENG MYAK KANG SAMYA SUMEWA ( SREPEK)
SIREP
PUNTA : RA SUN TIMBALI, MARAK SOWAN ONO NGARSANINGSUN ONO PARIGAWE OPO PATIH
PATIH : KEPARENG MATUR, BILIH WONTEN BRAHMONO MUDO, INGKANG KEPINGIN MARAK SOWAN MARANG WONTEN NGARSANING PADUKO KENG SINUWUN
PUNTA : YEN MANGKONO, WENEHONO MARGO, KON MARAK ONO NGARSANINGSUN
PUNTA : NUN INGGIH NGESTOKAKEN DAWUH
(SREPEK) AYAK- AYAK
SUKMA : AMIT PASANG KALIMAN TABIK, TINEBIHNO SIKU DENDANE JAWOTO GUNG, SINUWUN NYUWUN PANGAPUNTEN SOWAN KULO NGABYANTORO DATAN SARONO TINIMBALAN
PUNTA : PENEMBAN, OJO DIANGKEP PANJENENGANINGSUN KUWI ANGKUH, PANCEN KATEMBEN WAE WERUH, MULO PANJENENGANINGSUN MITAMBUH, BOYO SOPO KANG DADI PEPARABE SANG BEGAWAN KAN NEMBE PRAPTO
SUKMA : MENAWI PADUKO KENG SINUWUN NDANGU DUMATEN KULO, KULO MENIKO BRAHMONO KLEYANG KABUR KANGINAN, KEMUL MENDUNG, KEKUDUNG LANGIT, DENE NAMI KULO PUN BEGAWAN SUKMO LANGGENG
PUNTA : SUKMO LANGGENG
SUKMA : INGGIH NGESTOKAKEN DAWUH
PUNTA : BEGAWAN SUKMO LANGGENG, DUWE SEDYO OPO DENE SIRO NGABYANTORO ONO NGARSANINGSUNG
SUKMA : SINUWUN WALEH WALEH MENOPO, BILIH KULO KINODRAT DADOS PENDITO, PRAMILO HAMBEGIPUN PENDITO MENIKO, KEDAH DAMEL TENTREM LAN AYEMIPUN NDOYA, PRAMILO KANG KANTHI DASAR MENIKO KULO MANGERTOSI BILIH NEGARI NGAMARTO DINTEN MENIKO KADYO SURYO INGKANG KALINGAN MEGO, PETENG NDEDET LELIMENGAN, KETAMAN PAGEBLUK MAYANGKORO, PRAMILO RUMAOS GINUGAH MANAH KULO, ORA KETANG KLUNGSU-KLUNGSU MELU UDU, NGUDARI RERUWET, MADANGAKEN PEPETENG INGKANG HANGLIMPUTI ING NEGARI NGAMARTO MENIKO
PUNTA : PENEMBAN, YEN MITURUT PENGGALIHIPUN PENEMBAN, OPO KANG NJALARI NEGARA NGAMARTO KETAMAN PEGEBLUK MAYANGKORO
SUKMA : MENAWI MITURUT GAGASAN KULO, NEGARI NGAMARTO KETAMAN PAGEBLUK INGKANG KADOS MEKATEN MENIKO, UJUD SAKING UJIAN SAKING GUSTI INGKANG AKARYO JAGAT, AWIT MITURUT KULO PARA KAWULO ING NGAMARTO MENIKO SAMPUN LALI KARO GUSTI, LALI MANEMBAH, LALI KARO SING GAWE URIP, ORA NGRUMANGSANI YEN TO URIP MENIKO ENTEN INGKANG NGURIPI, WONG OBAH MENIKO ENTEN INGKANG NGOBAHAKEN NGIIH MENIKO GUSTI INGKANG AKARYO JAGAT, PRAMILO GUSTI PARING BEBENDU AWUJUD PAGEBLUK MAYANGKARA MENIKO SUPADOS PARA KAWULO ING NGAMARTO TANSAH ELING KARO SING GAWE URIP
PUNTA : MITURUT GAGASANE SANG PENEMBAN, OPO SING KUDU TAK TINDAKAKE SUPOYO NEGARA NGAMARTO BISO MULYO
SUKMA : NGETEN SINUWUN, MITURUT GAGASAN KAWULA, NEGARI NGAMARTO SAGET WALUYO JATI, JATI TEMAH NIRMALA, WATON PADUKO KENG SINUWUN SAGET NDANDANI MORALIPUN PARA KAWULA, DIPUN KANTHI SESARENGAN SUPADOS DO ELING KARO SING GAWE URIP, PADA ELING KARO GUSTI KANG AKARYO JAGAT, MENAWI PARA KAWULA SAMPUN PADA ELING KARO SING GAWE URIP, TARTEMTU NEGARI NGAMARTO BAKALA NEMAHI MULYO TENTREM SAK LAMIYO
DURNA : HE PENEMBAN…OJO NGAWUR UCAPMU KOWE..(SAMPAK)
ADA ADA
Kagyat risang kapirangu,
Rinangkul kinempit-kempit,
Dhuh sang retnaning bawana,
Ya si tukang walang ati,
Ya si tukang ngenesing tyas,
Ya si tukang kudu gering.
DURNA : SUKMO LANGGENG, HE SUKMA LANGGENG
SUKMA : KULO WONTEN DAWUH
DURNA : MADEPO MBURI, MADEPO RENE…O LOLE LOLE…ONO PENDITO ENOM KEMARUK, KETOK NEK LAGI MEGURU ANYARAN, KARO SOPO SOPO NUTURI, KARO SOPO SOPO NGANDANI, PETUK SOPO SOPO DI CERAMAHI, SUKMO LANGGENG MADEP RENE
SUKMA : SINUWUN, MENOPO DIPUN KEPARENGAKEN, KULO NGUNGKURAKEN PADUKO
PUNTA : IYO, ORA DADI BAYA PANGAPA PENEMBAN
SUKMA : MATUR NUWUN
DURNA : WASPADAKNO KOWE ORA NYAWANG SOPO SING ONO SAK KIWO TENGENMU, KOK KOYO WONG DLEMING, KOYO GURU MULANG RO MURITE, OPO KOWE ORA NGERTI NING MBURIMU ONO SOPO, ONO PENDITO SING KONDANG KAONANG ONANG.
SUKMA : NYUWUN SEWU PADUKO MENIKO SINTEN
DURNA : LHO KOWE DURUNG TEPUNG KARO AKU, KOWE DURUNG KENAL KARO AKU
SUKMA : NUN INGGIH DERENG
DURNA : O GENAH NEK KOWE ORA TAU NONTON TV KOWE, ORA TAU MOCO KORAN KOWE..YO KENALNO AKU PENDITO KANG HANJAYEN BAWONO SING KONDANG KAONANG ONANG, PENDITO DURNO AKU, YO RESI KUMBOYONO
SUKMO : DIPUN TEPANGANKEN NAMI KULO
DURNA : SUKMO LANGGENG, WIS WERUH AKU, OPO MBOK KIRO AKU BUDEG NGONO PO PIYE
SUKMA : MENAWI ATUR KULO NDADOSAKEN GERAH PENGGALIH PANJENENGAN, KERSANIPUN KADOS PUNDI
DURNA : AKU TAK TAK TAKON KARO KOWE, DASARMU OPO KOWE NGUCAP YEN TO PAGEBLUK ING NGAMARTO IKI DISEBABKE KARO PORO KAWULA SING LALI PANEMBAHE
SUKMA : DASAR KULO KASUNYATAN, KASUNYATAN INGKANGDUMADI WONTEN ING NEGARI NGAMARTO, SAK PERANGAN PARA KAWULA ING NGAMARTO SAMPUN LALI MARANG PANEMBAHE, SAMPUN LALI KARO GUSTINE
DURNA : KOSEK, OMONGANMU MBOK BOLAN BALENI, GUSTI KANG AKARYO JAGAT, GUSTI KANG AKARYO JAGAT…….GUSTI KANG AKARYO JAGAT KI SOPO
SUKMA : NOPO BOPO PENEMBAN MBOTEN PERCOYO KAWONTENAIPUN GUSTI KANG AKARYO JAGAT
DURNA : ORA PERCOYO
SUKMA : DASARIPUN MBOTEN PERCOYO
DURNA : DURUNG TAU KETEMU, DURUNG TAU JAGONGAN, DURUNG TAU CANGKRUKAN, DURUNG TAU NGOPI BARENG, WONG DURUNG TAU WERUH KOK KON PERCOYO, TERUS PERCOYO KO ENDI
SUKMA : NUWUN SEWU PENEMBAN, MENAWI PENJENENGAN MBOTEN PERCOYO KALEH SING GAWE URIP, KULO BADE TAKON
DURNA : TAKON OPO
SUKMO : PANJENENGAN SUMERAP LINTANG
DURNA : WERUH
SUKMA : PANJENENGAN SUMERAP REMBULAN
DURNA : WERUH
SUKMA : SRENGENGE
DURNA : WERUH, OPO MBOK KIRO WUTO MRIKU,,,HE
SUKMA : MBOTEN ATEGES MEKATEN PENEMBAN, MENIKO WUJUD MENOPO MBOTEN
DURNA : WUJUD, LINTANG, REMBULAN SRENGENGE IKU WUJUD, DADI AKU PERCOYO, WONG ONO,, DADI JELAS JELAS AKU MESTI PERCOYO
SUKMA : MENAWI LINTANG REMBULAN SRENGENGE WUJUD, NIKI INGKANG DAMEL SINTEN
DURNA : NEK JENENGE WUJUD YO MESTI ONO SING GAWE
SUKMA : LAJENG INGKANG NDAMEL SINTEN
DURNA : GUSTI KANG AKARYO JAGAT
SUKMA : KENGING MENOPO PADUKO KOLO WAU MBOTEN PERCOYO KALEH GUSTI KANG AKARYO JAGAT, MONGKO JENENGAN NGENDIKO YEN LINTANG, REMBULAN SRENGENGE SING NDAMEL GUSTI KANG AKARYO JAGAT, BERARTI PENJENENGAN MENIKO PENDITO SING MENCLA MENCLE, MBOTEN ISO DIGUGU UCAPE..
SENGK : KAKANG DURNA
DURNA : PIYE DISUNI
SENGK : OJO NGGETAK NGGETAK…AYO MULEH MULEH WAE YO…HAWANE KOK ORA KEPENAK NGENE
DURNA : RASAH KUWATIR…SANTAI DI SUNI
SENGK : TENANG PIYE AKU DADI GEBROBYOS NGENE E
DURNA : HE PENEMBAN…OJO NGAWUR UCAPMU
SUKMA : SAKMENIKO KULO GENTI KEPINGIN NYUWUN PIRSO DUMATENG PANJENENGAN, SAKMENIKO NEGARI NGAMARTO KETAMAN
DURNA : KETAMAN PEGEBLUK MAYANGKORO, SAK DURUNGEN KOWE TEKO KENE AKU WIS MATUR ONO NGARSANING ANAK PRABU YUDISTIRO, YEN NEGORO NGAMARTO KETAMAN PEGEBLUK MAYANGKORO, LAN BISO WALUYA JATI, JATI TEMAH NIRMALA YEN WIS BISA MATENI ANOMAN.
SUKMA : LHO,,KUDU MATENI
DURNA : ANOMAN
SUKMA : DASARIPUN PENJENENGAN NEGNDIKO MEKATEN MENOPO
DURNA : DASARKU SOKO WANGSIT
SUKMA : WANGSIT SAKING
DURNA : WANGSIT SOKO DEWO
SUKMO : DEWO SINTEN
DURNA : DEWO SOKO KAHYANGAN TO YO, MOSOK DEWO SOKO…..
SUKMO : SEDOYO DEWO MENIKO SAKING KAHYANGAN, UMPAMI KAYANGAN KAENDRAN MENIKO BETORO INDRO, KAYANGAN SIDIK MANGUDAL-UDAL ULUN BATARA NARADA, DENE BETORO GURU SAKING KAYANGAN SURALAYA
DURNA : SING PARING WANGSIT NING AKU, ULUN BATORO GURU SOKO KAYANGAN SURALAYA,….WIS PIYE..IKI RATUNE PORO DEWA…HAYO
SUKMA : MENAWI MEKATEN KULO ATURI NENGGO WONTEN MRIKI SEKEDAP, KULO ATURI PINARAK LENGGAH INGKANG SEKECO
DURNA : LHA KAREPMU
SUKMA : KULO BADE MUNGGAH WONTEN ING KAYANGAN, NOPO LEREDS ULUN BATARA GURU PARING WANGSIT DUMATENG PENJENENGAN, MENAWI LERES ULUN BATORO GURU PARING WANGSIT..KULO PIYAMBAK INGKANG BADE MEJAHI ANOMAN, MENAWI MBOTEN LERES PENJENENGAN KEDAH TANGGUNGJAWAB BAB MENIKO….
DURNA : KOWE YEN BAKAL MUNGGAH ONO KAYANGAN SUROLOYO BENGI IKI, ORA BAKAL KETEMU KARO ULUN BATORO GURU
SUKMA : DASARIPUN
DURNA : DASARE BENGI IKI BETORO GURU, ORA ONO NING KAYANGAN MERGO NONTON WAYANG NING…..
SENGK : KANG…AYO BALI WAE YO…SUWE SUWE KOK TAMBAH ORA JELAS
DURNA : TENANG SENGKUNI
SENGK : TENANG-TENANG PIYE
DURNA : SUKMA LANGGENG
SUKMA : KULO WONTEN DAWUH
DURNA : NEK DITUTUKNE ONO KENE KURANG PRAYOGA, AYO METU NJABA, AKU ONO REMBUG KARO KOWE ( SAMPAK)
BANTAH DURNO LAN BEGAWAN SUKMO LANGGENG
DURNO : SUKMO LANGGENG, TAK AKONI KEWE PENDITO SING TETETK, TATAK WANI NGADEPI PENDITO SENIOR KOYO BEGAWAN DURNO.
SUKMO : NGGIH KULO NAMUNG NDEREK KERSANING SANG BEGAWAN KINEN MANGGIHI PADKO WONTEN ING ALUN ALUN NEGARI NGAMARTO
DURNO : IYO
SUKMO : LAJENG KERSANIPUN KADOS PUNDI
DURNO : NGENE, ANTARANE KOWE OPP AKU,.. SALAH SIJI KUDU LUNGO SOSKO NEGORO NGAMARTA, DI KEDUK SEPIRO JERONE NGELMUMU, SIPIRO JERONE NGELMUNE BEGAWAN DURNO, YEN KOWE ISO MBATANG CANGKRIMANKU, AKU TRIMO LUNGO SOKO NEGARA NGAMARTA, PIYE ?
SUKMO : MONGGO KULO NAMUNG NDEREK KERSANE SANG BEGAWAN DURNO
DURNO : SENGKUNI
SENGK : OPO WAKNE GONDEL
DURNO : KOWE MINONGKO DADI SEKSINE
SENGK : IYO, AKU TAK MINONGKO DADI SEKSINE
DURNO : SUKMODIIBARATKE WONG NGEDUK SUMUR, AKU LUWIH JERO KEDUKANE TINIMBANG BEGAWAN SUKMO LANGGENG
SENGK : HOK O KAKANG, UMPOMO PODO PODO SUMURE KEDUKANE JERO KAKANG DURNO TIMBANG SUKMO LANGGENG
DURNO : IYO,..SUKUR YEN KOWE WIS NGERTI
SENGK : NANGING NGENE KAKANG, SENADYAN SUKMO LANGGENG KUWI KEDUKANE SUMUR LUWIH CETEK, NANGING BANYUNE BENING TUR MEGUNG, BEDO KARO KAKANG DURNO, SENADYANTO SUMURE KEDUKANE JERO, NANGING WIS ORA METU BANYUNE LAN JER NANDOK WATU WAE..
DURNO : KOWE KI JANE ROMBONGANE SOPO TO, MANGKATE BARENG AKU KOK MALAH MBELO WONG LIYO,..RUMANGSAKU UWONG KOK RA DUWE PENDIRIAN, KENE DIILONI KONO DIILONE, PAMRIHE MUNG GOLEK BATHI TOK WAE……, HE SUKMO LANGGENG?
SUKMO : KULO NGESTOKAKEN DAWUH
DURNO : MORO GAGE BATANGEN CANGKRIMANKU..
1. OPO SING PADANGE NGUNGKULI SRENGEGE
2. OPO SING DUWURE NGUNGKULI LANGIT
3. OPO SING ABOTE NGUNGKULI BUMI
4. OPO SING KETELE NGUNGKULI SUKET
5. OPO SING RIKATE NGUNGKULI KILAT
6. OPO SING PANASE NGUNGKULI GENINE NEROKO
7. OPO SING LEMBUTE NGUNGKULI BANYU
8. OPO SING JEMBARE NGUNGKULI SEGORO
HAYO,..MODAR PORA KOWE, PIYE NGELU TO KOWE,..ANGEL TO, KOWE MESTI WIS RA ISO MBEDEK,.. NEK ORA ISO NYERAH YO RA POPO,, NGOMONG EMBEK NGONO WAE…MESTI TAK AMPUNI,…PIYE
SUKMO : PENEMBAN
DURNO : OPO
SUKMO :
1. PADANGE NGUNGKULI SRENGENGE MENIKO PADANGE ATI
2. DUWURE NGUNGKULI LANGIT MENIKO KATRESNANE BOPO MARANG PUTRO
3. ABOTE NGUNGKULI BUMI MENIKO KATRESNANE IBU MARANG ANAKE
4. KETELE NGUNGKULI SUKET MENIKO KEKAREPANIPUN MANUNGSO
5. RIKATE NGUNGKULI KILAT MENIKO CIPTANIPUN MANUNGSO
6. PANASE NGUNGKULI GENINE NEROKO MENIKO NAFSUNIPUN MANUNGSO
7. LEMBUTE NGUNGKULI BANYU MENIKO BEBUDENIPUN MANUNGSO
8. JEMBARIPUN NGUNGKULI SEGARO MENIKO GEGAYUHANIPUN MANUNGSO
LERES MENOPO SALAH BOPO PENEMBAN
SENGK : AYO…..NEK BENER YO NGOMONGO BENER…NEK SALAH YO NGOMONGO SALAH, AYO IKI BENER OPO SALAH WANGSULANE BEGAWAN SUKMO LANGGENG IKI
DURNO : NGENE LHO DI SUNI,..NEK AKU MENEG WAE NGENE, KARO MRIPATKU KRIYAP KRIYIP NGENE BERARTI WIS PAS,,, BENER DI SUNI
SENGK : O..NGONO,,,.IKI BERARTI BENER
DURNO : IYO BENER, ..LHA SAK INI PITAKONKU SING NOER LORO,,, OPO TEGESE TRI KAYA PARISUDA…COBA TERANGNO SING TREWOCO
SUKMO : TRI KAYA PARI SUDA…TRI TEGESE TIGA…KAYA..TEGESE TUMINDAK…PARISUDA TEGESE SUCI UTAWI BECIK…DADOS TRI KAYA PARISUDA TEGESE TELUNG PERKORO INGKANG DADOS PANUTANING TYANG AGESANG..
1. MANACIKA TEGESE MENGGALIH INGKANG LERES
2. WACIKA TESESIPUN NGENDIKAN INGKANG LERES
3. KAYIKA TESESIPUN TUMINDAK INGKANG LERES
PRIPUN BOPO LERES MENOPO KLENTU
SENGK : AYO…
DURNO : PEH…PING PINDO WIS BENER KABEH….SAK IKI PITAKONKU SING TERAKIR…SING PUNGKASAN..MORO GAGE WANGSULONO..YEN KOWE ISO MANSULI PITAKONKU SING PUNGKASAN INI..YEN PERLU AKU MEGURO KARO KOWE…LAN TAK LUNGO SOKO NGAMARTO
DURNO : MENOPO PENEMBAN
DURNO : MBESRU BLEKITU KUWI OPO
SENGK : WIS…KOK SUWE SUWE NGAWUR IKI…MUNDUR ..MUNDUR KENE SEK
DURNO : OPO SENGKUNI
SENGK : NEK PERKORO MBESRU BLEKITU KUWI RASAH DITAKOKNE KARO BEGAWAN SUKMO LANGGENG IKI…HALAH SENGKUNI WAE YO ISO..
DURNO : OPO…COBA MBESRU BLEKITU KUWI
SENGK : DAR GOMBES TURU DI BLEKI WATU…WIS MINGGAT ( SAMPAK)
JEJERAN (NGAMARTO) PANDOWO
PUNTA : YAYI WERKUDARA
WERKU : MBAREP KAKANGKU OPO
PUNTA : YAYI…YEN TAK ROSO, KYO BENER ATURE BEGAWAN SUKMOLANGGENG, YEN TO PARA KAWULA ING NEGARA NGAMARTO, KURANG DUWE ROSO SUKUR, LAN UWIS LALI MANEMBAH MARANG GUSTI KANG AKARYO JAGAT
WERKU : IYO
PUNTA : MULO KANG SOKO IKU YAYI, REKSANEN KAYUWANANE BEGAWAN SUKMA LANGGENG, SI ADI RAK YO WIS NGERTI TO LAGAK LAGEANE KADANG KADANGMU PARA KURAWA,UTAMANE PAMAN HARYA SENGKUNI, RANGSAKU WAS SUMELANG KOYO NINGGAL BAYI ING SAK PINGGIRE JURANG KAHANANE BEGAWAN SUKMO LANGGENG, REKSANEN KAYUWANANE, REKSANEN KESLAMETANE, OJO NGANTI BEGAWAN SUKMO LANGGENG DIANCAP DENING BEBAYA.
WERKU : IYO, NGESTOKAKEN DAWUH, MBAREPKAKANGKU
PUNTA : KEMBAR
KEMBA : KULO WONTEN DAWUH KAKA PRABU
PUNTA : BUBARNO KANG PADA NGGANTUNG SEBA, INSUN BAKAL KUNDUR HANGEDATON BABLAS MUNGGAH SANGGAR PAMUJAN MEMINTA NGARSANING GUSTI KANG AKARYA JAGAT,MUGO MUGO ENGGAL ANTUK PITUDUH KANGGO KAMULYANE NEGARA NGAMARTO
KEMBA : NUN INGGIH NGESTOKAKEN DAWUH
POCAPAN: Lah ing kana ta wau, wus titi purnèng gati paséwakan, sang nata sasmita arsa jengkar manjing Lokapusantara. Saksana para wahini pawongan cèthi ingkang samya ngampil upacarèng aji, rep regedeg nguncupaken asta minangka tandha pakurmatan. Yayah WIGENO konduring Sang Nata Prabu YUDISTIRA
LIMBUKAN
BERSIH DESA
Bersih desa iku salah sijining upacara adat Jawa kanggo ngucapake syukur Marang Gusti Kang Akaryo Jagat, Upacara adat iki kadhang uga diarani upacara mreti desa lan biasa digabung karo upacara adat sedekah bumi utawa mreti bumi.
TUJUANE BERSIH DESA
- Kanggo ngucapake syukur marang gusti sing wis aweh wanugraha rejeki sing akeh kanggo masyarakat.
- Kanggo njaga keslametan para warga desa saka gangguan hal-hal sing gaib,roh utawa arwah sing gentayangan uga saka gangguan-gangguan penyakit, keamanan lan bencana.
- Kanggo ngresikake desa lan wargane saka alangan utawa kesusahan supaya kahanan desa dadi tentrem, ayem lan aman.
OBONG DUPA
Gandane kang sekar gadhung,
Lawan kembang-kembang menur,
Kang esmu arum,
Winor lan oyod-oyodan,
Kadi kusuma mangambar-ambar,
Wor kukusing dupa kang kumelun,
Kelun wor mega memba bathara,
Tan samar pamoring suksma,
Sinuksmaya wahyaning asepi,
Sinempen telenging kalbu,
pambukaning warana,
Tarlen saking liyep-layaping aluyup,
Pindha pesating supena sumusuping rahsa jati, E
CANDAKKAN NGAMARTO (PRANAKAN PENDOWO)
PUCUNG PALARAN
Sampun Rampung
Sang patih anggenya dawuh
Medal ing paseban
Samya undang para wadya
Gya budalan lampahnya anut wirama
PERANG GAGAL
PATET SANGA
Sang saya dalu araras,
Abyor lintang kang kumedhap,
Titi sonya madya ratri,
Lumrang gandanya puspita,o
Karenggyan pudyanira,
Sang dwijawara brengengen,
Lir swaraning madu branta, o
WITING KLAPA
Witing klapa jawata ing ngarcapadha
Salugune wong wanita
Dasar nyata kula sampun njajah praja
Ing Ngayogya - Surakarta
Sekar kawis, cinawis sekar melati
Dasar manis merak ati
Aduh Gusti sun rewangi pati geni
Pitung dina, pitung bengi
BOCAH BAJANG
Bocah Bajang nggiring angin
anawu banyu segara
ngon-ingone kebo dhungkul
sa sisih sapi gumarang
POCAPAN
LAH ING KANA TA WAU, DHEDHEP TIDHEM SAKALA ING RATRI, DUPI ING MANGKÉ WUS BYAR PADHANG LABET SAKING SULAKING SANG SITARESMI INGKANG MADHANGI ING TENGAHING LANGIT, NENANGI RIPTANING CIPTA MULYA INGKANG ANJOKIRA MRING PUJA-PUJI LUHURING KANG MURBÈNG RAT, DÉNÉ AMBABAR DAYA TENTREMING JAGAD. NALIKA ING MANGKÉ, ÉNDAHING TAWANG LABET TARANGGANA INGKANG SUMAWUR, KATHAH WARNANING KANG LINTANG-LINTANG INGKANG ABYOR ING LANGIT.
SINIGEG GANTI INGKANG WINURSITA, ‘TAN KADI PARA PUNAKAWAN INGKANG SAMYA JEJOGETAN KADYA NGUNGKURAKE SAMUBARANG. (LDR PANGKUR)
ADEGAN PURWAGANTI LAN PUNAKAWAN
Pathet Jugag, sléndro sanga
Leng-lenging driya mangu-mangu mangun kung, Kandhuhan rimang,
Lir léna tanpa kanin.
SEMAR : HE CAH BAGUS..KOWE KUWI SOPO, BOCAH SOKO NGENDI, ANAKE SOPO
PURWA : MENOPO KYAI SEMN SAMPUN KESUPEN KALIYAN KULO
SEMAR : CORO AKU LALI KUWI UWIS LUMRAH, MERGO AKU IKI WIS TUWO, PIKUN GAMPANG LALI, PANTARANE SEMAR KI WIAPADA DADI LEMAH, KOWE SAPA CAH BAGUS
PURWA : NAMI KULO PUN BAMBANG PURWAGANTI
SEMAR : BOCAH NGENDI GUS
PURWA : KULO SAKING PERTAPAN KENDALISODO
SEMAR : ANAKE
PURWA : KULO ANAKE BEGAWAN ANOMAN
SEMAR : E ALAH ( ANA TANGIS LAYUNG LAYUNG)
SEMAR : LHA KOK WIS GEDENE SEMONO TA GUS
PURWA : INGGIH KYAI
SEMAR : RENG, KOWE NGERTI PORA BOCAH IKI SOPO
GAREN : ORA MA
SEMAR : IKI BAMBANG PURWAGANTI ANAKE ANOMAN
GAREN : E LHO…KOK WES GEDE MEN LHE…
PURWA : INGGIH KI LURAH GARENG,..
GAREN : PENAKNO NGGONMU LUNGGUH YO LE…
PURWA : INGGIH KI, MBOTEN KIRANG SEKECO..ANGGEN KULO LENGGAH
GAREN : WAH IKI PETRUK MESTI KAGET IKI NEK WERUH IKI…TRUK….
PETRUK : OPO RENG
GAREN : KOWE NGERTI IKI SOPO
PETRUK : SOPO RENG
GAREN : IKI NGONO ANAKE NDORO ANOMAN, BAMBANG PURWAGANTI
PETRUK : E LHO….KOWE LE
PURWA : INGGIH KI LURAH
PETRUK : LHA KOK WES GEDENE SEMENE..PENAKNO NGGONMU LUNGGUH YA
PURWA : INGGIH KI, MBOTEN KIRANG SEKECO
PETRUK : IKI BAGONG MESTI KAGET NE WERUH IKI…GONG
BAGON : E LHO
PETRUK : EWONG DURUNG DIKANDANI KOK WES KAGET…KOWE KI KRUNGU OPO
BAGON : AKU NGANTUK… KOYO ONO SING NYELUK…GONG KAE LHO SEGONE METU..
PETRUK : SING MBOK PIKIR PANGANAN WAE…
SEMAR : HE WIS…OJO DO RAME DEWE…KOK MALAH PODO RAME WAE…GUS SAJAKE ONO WIGAT SING AREP MBOK ANDARKE NYANG AKU
PURWA : INGGIH KI, WONTEN BAB INGKANG BADE KULO TAKENAKEN DUMATENG KI LURAH SEMAR, MBOTEN WONTEN INGKANG SAGET KULO SUWUNI SANJOTO PITULUNGAN KEJAWI NAMUNG KI LURAH SEMAR
SEMAR : KOWE AREP TAKON OPO GUS
PURWA : KYAI MEH SAKCANDRA, KALUNGGUHAN SAKMANGKE, KANJENG RAMA BEGAWAN ANOMAN MURCA SAKING KENDALISADA, KYAI SEDAYA ING KENDALISODO KADOS DENE KELANGAN PENGAYOMAN, KEPARENGO KYAI SEMAR NUDUHAKEN WONTEN PUNDI DUNUNGIPUN KANJENG ROMO BEGAWAN ANOMAN KYAI..
ADA ADA
Soroting Pandam Sumuluh,
Madhangi Jroning Pasarean
Ngênani Wadana Arêmu-Rêmu
Kalingan Ngangrangan
Sang Dyah Manahên Kung
Sumungkêm Guling
Sang Kakung Mangrêpa
Babo Eman-Eman
Biratên Tikbranta
Aywa Sungkawa
Ulun Tadhah Runtik
Sumanggêm Sakarsa
Ngrabasèng Raras Rum
SEMAR : KOWE AREP NGGOLEKI BAPAKMU
PURWA : INGGIH KYAI
SEMAR : NGENE YO LE, BAPAKMU DADI PINGITANE SING GAWE URIP, LAN KOWE NGERTIYO, BAPAKMU KUWI PENDITO, PENDITO KUWI DUWE KEWAJIBAN MEMAYU HAYUNING BAWONO, LUNGANE BAPAKMU ORA MUSPRO TANPO GUNO, NING ONO GANDENG CENENGE KARO JAGAT, WIS TA BAPAKMU RASAH DI GOLEKI, SAK JANE SEMAR NGERTI PERKORO IKI, NING YEN NGANTI SEMAR NUDUHAKE NING NGENDI PAPANE PANGGONANE BAPAKMU, BAKALE SEMAR KENO SIKU DENDANE JAWOTO, BAPAKMU ANOMAN LAGI DADI LAKON, NGGER
PURWA : NGATEN KYAI
SEMAR : IYO,PANCEN KOYO MANGKONO
SEMAR : KAMONGKO KULO SAMPUN PRASETYO, JRONING MANAH KULO KULO MBOTEN BADE WANGSUL MENAWI DERENG KEPANGGIH KALIYAN KANJENG ROMO, KEPARENG KULO NYUWUN PAMIT.
SEMAR : KOWE AREP NYANG DI
PURWA : KULO BADE LUMAMPAH. MBOTEN BADE MANDEG MENAWI DERENG KEPANGGIH KANJENG RAMA BEGAWAN ANOMAN
SEMAR : YO YEN NGONO BAKAL TAK TUTKE LAKUMU, MERGO YEN ONO OPO OPO, AKU SING BAKAL DISALAHNE KARO BAPAKMU
PURWA : INGGIH KYAI, MATURNUWUN SAMPUN JAMPANGI LAMPAH KULO
PURWAGANTI PETUK YAKSO DEWA , DADI PERANG
MANYURA
WEJANGAN
WENAN : OM AWIGNAM ASTU NAMO SIDAM SEKARING BAWONO LANGGENG, ULUN WASPADAKAKE SING MUNGGAH KAHYANGAN ALANG ALANG KUMITIR, KOYO SUKMA MAYANGKORO IKI,WINANTU RAHARJOSAK TEKAMU NGGER
MAYAN : INGGIH PUKULUN, ANGSAL BERKAH PANGESTU PADUKO HYWANG PUKULUN LULUS RAHARJO PISOWANANIPUN SUKMA MAYANGKORO, KULO NGATURAKEN SUNGKEMING PANGABEKTI KUNJUK SAHANDAP PEPADA PADUKO HYWANG PUKULUN
WENAN : IYO IYO NGGER, WIS ULUN TOMPO GAWE BOMBONGING MANAH ULUN, ORA LIWAT PANGESTU ULUN TAMPANONO YO NGGER
MAYAN : NUN INGGIH KULO PUNDI WONTEN ING MUSTAKA, NDADOSAKEN JIMAT PARIPIH
WENAN : ONO SEDYA OPO, DENE SIRO NGABYANTORO ON NGARSANING ULUN, NGGER
MAYAN : ULUN, PEDAH MENOPO KULO MATUR, DENE SEDYANIPUN MANAH KULO SAMPUN KAWUNINGAN WONTEN ING NGARSO ULUN,
WENAN : ONO TETEMBUNGAN PITAKON NGONO WAJIBE YO DIWANGSULI, NGGER MAYANGKORO
MAYAN : NUN INGGIH, KEPARENG MATUR BILIH SOWAN KULO MENIKO, MERIHATOSAKEN KAHAN JAGAT, KAHANAN NDOYA SUPADO KAHANANIPUN SAGETO AYEM TENTREM, WALUYO JATI JATI TEKAH NIRMOLO, MEKATEN PUKULUN
ADA ADA
Punapa ta mirah ingsun,
Prihatin waspa gung mijil
Tuhu dahat tanpa karya,
Sengkang rinemekan gusti,
Gelung rinusak sekarnya,
Sumawur gambir melathi.
WENAN : PANCEN DINO IKI SIRO, ULUN ANTI ANTI NGGER SUKMA MAYANGKORO, AWIT YO SIRO IKI KANG BAKAL DADI KURUNGANE WAHYU KAMULYAN JATI, KANG BAKAL BISA NDADEKAKE JAGAT IKI BISO AYOM AYEM TENTREM, WALUYO JATI JATI TEMAH NIRMOLO, YO MUNG KANTHI SARONO WUJUDE WAHYU KAMULYAN JATI KANG BAKANG ULUN PARINGAKE MARANG JENENG SIRO NGGER SUKMA MAYANGKORO
MAYAN : MEKATEN PUKULUN
WENAN : IYO NGGER, ULUN BANGET NGATURAKEN PANUWUN MARANG JENEG SIRO, SAKLIYANE SIRO SUN PARINGI WAHYU KAMULYAN JATI SIRO BAKAL ULUN GANJAR BAGAS KWARASAN LAN UMUR KANG DOWO NGGER SUKMA MAYANGKORO
MAYAN : NUN INGGIH, NGESTIKAKEN DAWUH ULUN
WENAN : MORO GAGE, MENEPO SAWETARA,ULUN BAKAL PALING WUJUDE WAHYU KAMULYAN NGGER SUKMA MAYANGKORO
(SREPEK)
MAYAN : MATUR NUWUN PUKULUN, DENE KULO SAMPUN PINITAYA DENING DEWA, MINANGKA KURUNGANE WAHYU KAMULYAN JATI, SUPADOT DAMEL AYEN TENTREMING JAGAT.
WENAN : IYO NGGER, NGGONMU BALI MENGKO BAKAL GAWE TENTREMEN NEGARA NGAMARTO, DWARAWATI, MANDURO KAN NEMBE KETAMAN BEBENDU WUJUDE PAGEBLUK MAYANGKORO. SAK IKI KOYO ULUN TUNDUNG SUPAYA ENGGAL BALI ING MARCOPODO NYAWIJIO MARANG RAGAMU, SUPOYO ENGGAL PARING KATENTREMAN ING JAGAT SUKMA MAYANGKORO
(SAMPAK)
